𝕋𝕖𝕣𝕤𝕒-𝔽𝕖𝕚𝕣𝕒, 24 𝕁𝕦ñ𝕦 2025, Instituto Nacional de Farmácia e Produtos Médicos (FPM) kolabora hamutuk ho Departamento EPI Nasional Ministério da Saúde no parseiru dezenvolvimentu sira hanesan UNICEF no WHO hodi organiza formasaun durante loron 3 (Tolu) iha FPM Sentral, Rua Kampo Alor Dili.

Formasaun ne'e kona-ba Jestaun Korente Abastesimentu (JKA) no Managementu Produtu Vasina ba responsavel FPM iha nivel rejional, inklui husi RAEOA. Formasaun ne'e ho tema "Strengthening of Supply Chain Management on FPM including immunization management at Regional level's" nebé sei halo husi loron 24 to'o 26 Juñu 2025.

Formasaun ne'e nia objetivu boot mak dezenvolve responsavel rejional sira nia habilidade iha armazenamentu no distribuisaun vasina ho efetivu. Partisipante sira sei hetan koñesimentu kona-ba oinsa mantein vasina nia kualidade no potencia durante prosesu fornese tomak.

Formasaun ne’e sei fortifika sistema monitorizasaun no avaliasaun iha kada rejiaun, garantindo katak vasina sira to'o ba komunidade ho kondisaun ne'ebé di'ak. Objetivu importante seluk mak estreita kolaborasaun entre nivel nasional no rejional ba programa imunizasaun ne'ebé koordinadu no efetivu. Liu husi formasaun ne'e, responsavel sira sei bele implementa pratika di'ak liu ba jestaun cadeia fornese, redús risku desperdisiu, no asegura programa imunizasaun nasional susesu proteje populasaun tomak.

Formasaun ida ne’e hetan partisipasaun massimu husi Responsavel sira iha Rejional sira, husi Servisu Saúde Munisipal iha RAEOA no sira seluk tan.