Instituto Nacional de Farmácia e Produtos Médicos (FPM) hala’o atividade importante kona ba Divulgasaun no sosializasaun Kódigu Konduta Aprovisionamentu no Mata Dalan Aprovisionamentu FPM nian,

Liu husi aktividade hirak ne’e atu bele fó prioridade ba fortalesimento kapasidade iha área aprovisionamentu, boa governansa, no transparénsia institusional.

Atividade ida ne’e importante tamba sei fó oportunidade ba tekniku sira atu komprende ho loos kódigu konduta no mata dalan aprovisionamentu. Ida ne’e hala’o tanba ho esperansa ida atu asegura katak prosesu aprovisionamentu sira hotu sei realiza tuir padraun, prinsipiu étika, no regulamentu ne’ebé aplikavel.

Iha tempu hanesan, Atividade ne’e mos inklui apresentasaun husi Ministerio da Finansas kona ba Boa pratika Aprovisionamentu, Planu Aprovisionamentu husi Governo, introdusaun kona ba Sistema GRP versaun foun ne’ebé sei aplika iha tinan oin, no mos apresentasaun husi ekipa CNA kona ba pratika aprovisionamentu nian.

Aktividade ida ne’e mos hala’o iha metodu oioin atu bele partilha informasaun sira hanesan: Apresentasaun tékniku, Diskusaun grupu, Simulasaun prosesu aprovisionamentu husi fase planifikasaun to’o entrega.

Objektivu Fundamental husi aktividade refere mak hanesan:

1.     Hadia kompreensaun partisipante sira kona ba Kódigu Konduta Aprovisionamentu no mos Mata dalan Aprovisionamentu FPM nian no nia prinsipiu étika sira.

2.     Aprezenta boa pratika aprovisionamentu atu evita risku, aumenta efisiénsia, no garante transparénsia.

3.     Introdús sistema GRP versaun foun hodi prepara tekniku sira atu adapta ba plataforma digital ne’ebé sei aplika iha tinan oin.

4.     Haforsa kooperasaun liu husi partilha experiénsia husi ekipa CNA kona ba prosesu aprovisionamentu.

Aktividade Divulgasaun ne’e involve mos tekniku sira nebe hala’o funsaun iha parte aprovisionamentu no mos Finansas nian iha instituisaun seluk hanesan INSPTL, Unidade Aprovisionamentu Central Ministerio da Saude, DNFM, DNEM, HNGV, no mos seluk tan.

Atividade refere realiza tanba hetan suporta maka’as husi DFAT Australia no PHD.

FPM hakarak hato’o agradesimentu bo’ot ba DFAT no PHD nebe mak suporta ona hodi realiza atividade ida ne’e. Apoiu no kontribuisaun sira ne’e, maka sei fó forsa ba instituisaun atu kontinua hadia kapasidade, promove boa governansa, no fortalesa sistema aprovisionamentu iha instituisaun.

Partispa mos iha aktividade refere mak Reprezentante husi PHD Sr. Ismail Barreto no Diretora Ezekutiva FPM Sra. Paulina Mendonça Maher, S.E.