𝐌𝐚𝐧𝐚𝐭𝐮𝐭𝐨, 27 𝐅𝐞𝐯𝐞𝐫𝐞𝐢𝐫𝐮 2026 – Sua Exelénsia Primeiru Ministru, Kay Rala Xanana Gusmão, hala’o vizita ida ba Fatin Produsaun Oxijéniu iha Manatuto, ne’ebé harii husi Ministério da Saude liu husi Instituto Nacional de Farmácia e Produtos Médicos (FPM) ho apoiu finanseiru husi Divizaun Fundu Global.

Vizita ne’e objetivu atu hare no observa direta prosesu produsaun oxijéniu, ne’ebé hahu funsiona ba prosesu produsaun. Durante vizita, ekipa tékniku sira hatudu no fó esplikasaun ba S.E. Primeiro Ministro kona-ba funsionamentu makina produsaun refere no mekanismu operasional ba produsaun ida ne’e. Sua Exelénsia Primeiro Ministro mos apresia ba esforsu Ministério da Saúde liu husi instituto Nacional de Farmácia e Produtos Médicos (FPM) no mos parseiru Fundu Global ne’ebé kontribui ba realizasaun projetu estratéjiku ida ne’e.

Harii Fatin Produsaun Oxijéniu iha Manatuto ho objetivu importante mak atu bele redus orsamentu ne’ebé sei aloka ba kompras oxijéniu, no mos bele hakbesik liu tan produtos Oxijeniu ba iha fasilidade sira iha Munisipiu Manatuto rasik, no inklui mos ba Munisipiu 3 hanesan Baucau, Viqueque no Lautem.

Projetu ne’e mos atu asegura estabilidade, disponivilidade produto Oxyjéniu no seguransa ba fornesimentu oxijéniu, liu-liu iha situasaun emerjénsia hanesan pandemia ka kazu moras respiratóriu sira. Ho unidade produsaun iha rai laran, distribuisaun bele hala’o ho lalais no efisiente, hamenus risku falta oxijéniu (stock out) iha ospitál sira.

Alein ida ne’e, inisiativa ida ne’e kontribui ba autonomia nasional iha setor saúde, hodi hamenus dependénsia ba merkadu estranjeiru no fortalese kapasidade téknika rekursu umanu lokal iha área operasaun no manutensaun ekipamentu industrial medikal.

Ho harii fatin produsuan ba Oxyjeniu refere mak FPM atinji tan papel importante ne’ebé bazeia ba Dekretu Lei Numeru 57/2023, data 6 de Setembru, Fo kompetensia ba Instituto Nacional de Farmácia e Produtos Médicos (FPM) atu bele hala’o produsaun ba produto farmaseutiku no produtos sira seluk. Ho nune’e mak FPM kompremetidu buka esforsu hotu, ho apoiu husi Parseiru Fundu Global hodi konsegue harii fatin produsaun ba Oxyjéniu iha Manatuto, tanba setor saúde mak nudar pilar prinsipal no sai mos nudar seitor prioridade ba IX Governo Constitusional, tanba ne’e maka wainhira halo investimentu ba iha seitor saúde signifika investimentu iha moris no futuru povu Timor-Leste nian.

Iha Vizita S.E. Primeiro Ministro nia refere, akompanha mos husi S.E. Ministra Saúde (MS) dr. Élia A.A. dos Reis Amaral, SH. ; S.E. Ministro Estatal, no mos membru governu sira seluk tan, Diretores Jerais sira husi Ministerio da Saude, Autoridade no Diretores sira husi Munisipiu Manatuto no seluk tan.