𝗠𝗮𝗻𝗮𝘁𝘂𝘁𝗼, 27 𝗙𝗲𝘃𝗲𝗿𝗲𝗶𝗿𝘂 2026 – Fundu Global ofisialmente entrega fatin produsaun oxyjeniu iha Manatuto ba FPM liu husi serimónia termu entrega ne’ebé realiza iha fatin Produsaun nian iha Manatuto no ho partisipasaun husi reprezentante Parseiru Fundu Global no mos lideransa Instituto Nacional de Farmácia e Produtos Médicos (FPM) no parseiru sira seluk.
Serimónia entrega ne’e marka momentu importante ida iha esforçu hamutuk atu hametin sistema saúde iha Timor-Leste, liu-liu iha area fornesimentu oxyjeniu mediku ne’ebé sai hanesan nesesidade esensiál ba tratamentu pasiente sira iha ospitál no fasilidade saúde sira.
Liu husi apoiu husi Fundo Global ne’e, hodi fo suporta ba konstrusaun no ekipamentu fatin produsaun ida-ne’e hatudu komitmentu atu tulun Timor-Leste hasa’e kapasidade nasionál, hodi asegura asesu ba produtos sira iha fasilidade saúde ne’ebé di’ak no sustentavel.
Diretora Ezekutiva FPM hato’o agradesimentu bo’ot ba Fundu Global ba konfiansa no apoiu finansial no tékniku ne’ebé fó tiha ona. FPM reafirma nia prontidaun atu jere no opera fatin produsaun oxyjeniu ida-ne’e ho profesionalizmu, garantia nia utilizasaun no sistema kontrolu ne’ebé sustentavel atu garante kualidade no seguransa produtu.
Liu husi inisiativa ida-ne’e, espera katak fornesimentu oxyjeniu ba fasilidade saúde sira iha rai-laran sei sai diak liu tan no efisiente.
Iha biban hanesan mos parte Fundo Global Aprezenta funsionariu FPM nian nebe durante ne'e parte Fundo Global hamutuk ho kompanhia internasional sira fo kapasitasuan no formasaun tekniku kona ba operasaun makina produsaun oxyjeniu nian hodi bele hahu sira nia knaar tuir sira nia termu referensia nebe FPM atribui ba.
Serimónia refere remata ho assina akta no entrega simbóliku dokumentus no inklui xave odamatan ba fatin produsaun husi parte Fundo Global ba FPM nebe reprezenta husi Administrador Interna Fundo Global ba iha Diretora Ezekutiva FPM.
Partisipa mos iha Serimonia refere mak Diretores no xefia sira husi FPM, Dirijentes sira no ekipa husi Divizaun Fundo Global, Funsionariu sira ne'ebe atu servisu iha produsaun Oxyjeniu nian ho tan sira seluk tan.
