Díli, 02 Marsu 2026 – Instituto Nacional de Farmácia e Produtos Medícos (FPM), Realiza Serimónia isár Bandeira Nasional iha Semana Dahuluk inísiu fulan Marsu 2026 ne’ebé realiza iha edifísiu FPM, Rua Kampo Alor Dili Timor Leste.
Serimónia Isár Bandeira Nasional ida-ne’e sai hanesan tempu atu fó Honra, respeitu no atu fo valor ba herói sira ne’ebé mak fó sira nia-an tomak hodi halo sakrifísiu boot ba libertasaun rai doben Timor-Leste husi okupasaun sira.
Ida ne’e mos atu hametin liu tan sentidu patriotizmu, unidade no responsabilidade ba funsionáriu sira hotu atu bele hala’o sira nia kna’ar ho dedikasaun, disiplinadu no profisionalizmu aas. Liu husi momentu sira ne’e, Funsionariu sira bele refleta kona-ba sira nia papél no kontribuisaun iha dezenvolvimentu instituisaun nian no nasaun tomak.
Diretora Ezekutiva FPM, Sra. Paulina Mendonça Maher, S.E.; mai lidera hodi sai nudar Inspetora ba Serimónia Isár Bandeira refere. Iha Intervensaun lideransa FPM ne’e hato’o apelu ba funsionáriu sira atu mantein espírito servisu públiku, servisu ho transparénsia no onestidade, no sempre tau interese instituisaun nian iha prioridade. Servisu hamutuk iha Unidade no solidariedade entre kolega servisu sira atu sai hanesan forsa prinsipál atu atinji objetivu instituisaun nian ho di’ak.
Aproveita momentu ida ne’e Diretora Ezekutiva mos hato’o agradesimentu ba Funsionariu sira, kargu Diresaun no Xefia sira ba susesu nebe hetan hodi bele harii fatin produsaun oxyjeniu iha Manatuto nebe halo ona lansamentu no hahu ona produsaun ba oxyjeniu. Ida ne’e sai hanesan passu importante atu bele garante disponibilidade no estabilidade fornesimentu oxyjeniu ba fasilidade saúde sira iha rai-laran.
Responsavel ba Serimónia refere mak Diresaun Kompras, hamutuk ho estudante estajiariu no anima husi Koru Saun Rafael FPM. Serimónia Isár Bandeira refere hala’o ho Susesu no hetan partisipasaun massimu husi Superior sira, kargu xefia no diretor sira, funsionáriu sira hamutuk ho Servisu Limpeza, servisu Seguransa inklui Estudante Estajiariu sira husi IOB, UNTL, ICS no sira seluk tan.
