𝘿𝙞𝙡𝙞; 13 𝘼𝙗𝙧í𝙡 2026; Instituto Nacional de Farmácia e Produtos Médicos (FPM) realiza Serimónia Enseramentu ba Programa Estájiu Estudante sira husi Institute of Business (IOB) no Jovtramu Transformativu Training Center (JTTC), ne’ebé hala’o durante fulan tolu iha FPM.

Programa estájiu ida ne’e hahú iha fulan Janeiru 2026 no remata iha fulan Abríl 2026, ho objetivu atu fó oportunidade ba estudante sira atu hasa’e sira-nia koñesimentu prátiku no kapasidade profisionál, liu-liu iha área jestaun administrasaun, lojístika, finansas no rekursu umanu.

Durante períodu estájiu, estudante sira partisipa ativamente iha atividade diária iha FPM. Esperiénsia ida ne’e kontribui signifikativamente ba dezenvolvimentu kompeténsia no preparasaun sira atu tama iha mundu servisu ho di’ak liu no responsavel.

Iha serimónia enseramentu, FPM hatudu apresiasaun aas ba estudante sira hotu tanba dedikasaun, disiplinu no responsabilidade ne’ebé sira hatudu durante programa estájiu. Nune’e mos, FPM entrega sertifikadu ba estajiáriu sira nudar sinal rekonesimentu no agradesimentu ba kontribuisaun ne’ebé sira fó durante períodu estájiu.

Atividade ida ne’e reflete FPM nia kompromisu atu kontinua fó apoiu ba dezenvolvimentu rekursu umanu iha Timor-Leste, liu husi kooperasaun ho instituisaun edukasaun sira. Programa ida ne’e mos sai hanesan parte importante husi esforsu atu hasa’e kualidade rekursu umanu nasionál, liu-liu iha setór saúde.

Serimónia enseramentu ne’e konta ho partisipasaun husi Diretora Ezekutiva FPM, Sra. Paulina Mendonça Maher, S.E.; Chefe Departamentu Kontabilidade, Sr. Guilhermino Paulo Barreto; Diretora JTTC, Sra. Lucia Vieira; Diretor Administrasaun, Planeamentu, Finansas no Rekursu Umanu, Sr. Domingos Afonso; Diretor Aprovisionamentu no Kontratasaun, Sr. Krizanto Monteiro; no mos kargu xefia sira seluk.