𝘿í𝙡𝙞, 06 𝙅𝙪ñ𝙪 2026 – Diretora Ezekutiva Instituto Nacional de Farmácia e Produtos Médicos (FPM) Sra. Paulina Mendonça Maher, S.E., akompnha husi Diretor no Xefia sira hala’o enkontru servisu ho ekipa Servisu Saúde husi Rejiaun Administrativa Espesiál Oe-Cusse Ambeno (RAEOA) hodi diskute no harmoniza mekanizmu implementasaun prosesu kompras no fornesimentu produtos medikamentus tuir akordu kooperasaun ne’ebé iha entre instituisaun rua ne’e.

Iha enkontru ne’e, parte rua halo diskusaun kle’an kona-ba prosesu aprovisionamentu produtos medikamentus, hahú husi identifikasaun nesesidade, preparasaun dokumentasaun téknika ba Espesifikasaun, prosesu kompras, jestaun kontratu, to’o distribuisaun no fornesimentu produtos médikus ba RAEOA. Diskusaun ne’e importante atu asegura katak prosesu hotu hala’o tuir prinsípiu transparénsia, efisiénsia no responsabilidade ne’ebe mak hatuur ona iha Akordu kooperasaun entre parte rua.

Tuir akordu kooperasaun ne’ebé estabelese entre FPM no RAEOA, FPM responsabiliza atu hala’o prosesu aprovisionamentu no kompras produtos medikamentus no ekipamentu saúde sira to’o prosesu distribuisaun produto medikos sira ba RAEOA bazeia ba lista kuantifikasuan nebe parte RAEOA husu. Além ne’e, FPM mos iha responsavilidade atu garante katak produtos sira ne’ebé kompras mai ne’e ho kualidade di’ak, tuir padraun no regulamentu aplikável.

FPM mos kompremete atu nafatin involve mos pessoal tekniku sira iha kapasitasaun nian wainhira realiza aktividade formasaun sira iha area Supply Chain Managament, Oinsa atu opera ekipamentus ForkLift iha Armazém laran.

Durante enkontru ne’e, parte rua mós troka informasaun kona-ba planu nesesidade medikamentus ba períodu oin mai, liga ho orsamentu Retifikativu ne’ebé parte RAOEA hetan, nune’e parte RAEOA bele hahu prepara ona lista kuantifikasaun no espisifikasaun ba item ka produtos ne’ebé planu atu kompras tan.

Parte rua mos deskute klean liu tan kona ba mekanizmu koordenasaun entre instituisaun sira, no estratéjia atu hametin sistema fornesimentu hodi prevene falta stock medikamentus no ekipamentu médiku iha fasilidade saúde sira iha RAEOA inklui mos kona ba finansas liu-liu ba prosesu pagamentu ba invoice sira.

Ekipa FPM no RAEOA reafirma sira nia kompromisu atu kontinua servisu hamutuk ho espírito parseria no responsabilidade mútua, hodi garante katak prosesu aprovisionamentu no fornesimentu produtos medikamentus bele hala’o ho di’ak no fó benefísiu diretu ba servisu saúde no bem-estar komunidade sira iha RAEOA.

Enkontru ne’e sai nu’udar pasu importante ida atu hametin relasaun kooperasaun institusionál entre FPM no RAEOA, hodi promove jestaun efisiente no sustentável ba produtos medikamentus no ekipamentu saúde iha Timor-Leste.

Hafoin remata enkontru ekipa RAEOA hala’o vizita ba iha armazém Sentral FPM nian atu bele observa ba prosesu jestaun armazenamentu sira hanesna armamemntu produtos sira, jestaun rack sira no utilizasaun Freezer room no seluk tan.