17 Abril 2026 - Instituto Nacional de Farmácia e Produtos Médicos (FPM) realiza serimónia ofisiál ida hodi entrega hikas estudante estajiáriu sira ba Universidade Nasional Timor Lorosa'e (UNTL), hafoin remata programa estájiu ne’ebé hala’o durante períodu determinadu iha instituisaun ne’e.

Programa estájiu ne’e fó oportunidade ba estudante sira atu hetan esperiénsia prátika direta iha ambiente servisu, liu-liu iha área farmásia no jestaun produtus médikus. Durante estájiu, estudante sira hatudu dedikasaun, disiplina no kapasidade atu aplika koñesimentu teóriku ba situasaun real iha servisu loron-loron.

Iha serimónia ne’e, reprezentante husi FPM hateten agradese ba estudante sira tanba kontribuisaun no partisipasaun ativa durante programa estájiu, no espera katak esperiénsia ne’e bele sai base forte ida ba dezenvolvimentu profisionál iha futuru.

Husi parte Universidade Nasional Timor Lorosa'e (UNTL), hatudu apresiasaun ba FPM tanba fó oportunidade ba estudante sira atu aprende no dezenvolve kapasidade prátika.