Instituto Nacional de Farmácia e Produtos Médicos (FPM) hala’o serimónia isár Bandeira Nasionál ba Fulan Juñu nian ho susesu iha resintu FPM Rua Kampo Alor Dili Timor-Leste.

Serimónia Isár Bandeira refere lidera husi Diretora Ezekutiva FPM nudar Inspetora Serimónia no mos hetan partisipasaun massimu husi kargu Diresaun, Xefia sira, funsionáriu FPM, Voluntariu no Estajiadu sira inklui Servisu Seguransa no Servisu Limpeza sira.

Serimónia isár Bandeira Nasionál ne’e hala’o atu fo ómenajen ba luta no sakrifísiu herói no mártir sira ne’ebé fó sira nia moris atu Timor-Leste bele hetan independénsia no soberania. Liu husi atividade ne’e, bele hamoris no hametin sentidu patriotizmu, unidade Nasional no responsabilidade iha ema hotu-hotu nia fuan, hodi valoriza istória luta libertasaun nasaun nian no kontinua kontribui ba dezenvolvimentu Nasioal liu husi knaar loron-loron nian.

Iha nia intervensaun badak, Diretora Ezekutiva FPM nafatin enkoraja ba dirijentes sira no mos servisu nain FPM nian atu mantein disiplina iha Servisu fatin, respeitu ba oras servisu, pontualidade iha Servisu fatin. Tan ne’e, ema hotu-hotu tenke kontinua servisu ho Responsabilidade, onestidade no dedikasaun atu kontribui ba dezenvolvimentu nasaun nian.

FPM reafirma nafatin nia kompromisu atu promove kultura institusionál ne’ebé bazeia ba responsabilidade, integridade no servisu di’ak ba povu, hodi kontribui ba konstrusaun Timor-Leste ne’ebé progresivu no sustentável.

Serimónia isár Bandeira Nasionál ba fulan Juñu responsabiliza husi Diresaun Aprovisonamentu no Diresaun Novos Projetos no Responsavel ba Koru mak Koru FPM Sao Rafael.